上一页

ⓘ 小西灣 ,本名 柴灣仔 ,亦叫 小柴灣 ,係香港一地,亦喺一灣,響柴灣東面。灣已填,化身新興嘅住宅區,人口約莫七萬。行政上歸東區。 ..




小西灣
                                     

ⓘ 小西灣

小西灣 ,本名 柴灣仔 ,亦叫 小柴灣 ,係香港一地,亦喺一灣,響柴灣東面。灣已填,化身新興嘅住宅區,人口約莫七萬。行政上歸東區。

                                     

1. 名

原名 柴灣仔 ,皆因地近柴灣。英文柴灣初時唔寫做 Chai Wan,或口音,或誤聽,寫做 Sai Wan。柴灣仔就半音半意,繙成 Little Sai Wan 。及後師爺不明所以,將佢倒繙做 小柴灣 、 小西灣 。師爺再倒轉返英文,今英文寫 Siu Sai Wan 。

                                     

2. 地理

小西灣喺柴灣一帶,範圍包括永泰道以東嘅地方。喺未填海之前,小西灣係柴灣東邊嘅灣仔。

                                     

3. 史

小西灣一帶原本係英國情報中心。1947年,英國同埋美國、澳洲、加拿大、新西蘭簽署聯合收集情報嘅協議。因此,英軍喺小西灣起咗成個遠東最大規模嘅情報中心,監聽中國無線電通訊。到咗1980年代,香港將會鐵定會交畀中國,英軍就將成個情報中心拆到渣都無淨。

去到1980年代,因為要起地下鐵路,柴灣市區嘅徙置大廈要拆,政府為咗安置呢班居民,加上應付日益膨漲嘅市區人口,所以決定開發小西灣。當時政府見小西灣個小西會令人諗起屌屄兩個性器官兼粗口字,唔係咁好聽,所以建議過改名做 小柴灣 ,但因為當地居民反對,所以幾年後小西灣邨落成,將個名改返做小西灣。但係家下香港的士同業都採用佢嘅諧音做呢個地區嘅暗語。

小西灣由於好近鯉魚門,環境極佳,所以政府就喺當地起居屋來賣,樓盤包括富景花園、富怡花園同富欣花園等。而對海皮一塊地,更加引到大型地產發展商信和置業來投,喺1997年佢用咗118億港紙投到,起咗豪宅藍灣半島。而該地價就創下香港最高賣地成交價,直到2017年由龍光地產同埋合景泰富一齊用168.6億港紙投到鴨脷洲利南道地皮,記錄先至打破。

                                     

4. 教育

小西灣有多間中小學校,中學有中華基金中學、漢華中學、福建中學 小西灣、衛理中學同嶺南衡怡紀念中學,而小學就有培僑小學。

                                     

5. 交通

藍灣半島起好,小西灣越來越多人住,新巴同城巴兩間巴士公司將唔少原本以柴灣東為總站嘅巴士線,加長到小西灣,總站重搬到小西灣邨同埋藍灣半島兩個大巴士總站。

政府曾建議地下鐵路研究將 港島綫 從柴灣延伸入小西灣,但由於路線太過兜轉,地鐵公司唔受。地鐵亦研究過用輕便鐵路將小西灣同柴灣連埋,但係造價同融資好多問題搞到不了了之。

                                     

6. 住宅

  • 富景花園:私人參建居屋屋苑。有11座住宅,一個2層商場同停車場。
  • 小西灣邨:小西灣第一個公共屋邨,喺1989年至1993年分3期落成。有瑞喜樓、瑞樂樓、瑞強樓等。
  • 曉翠苑:居者有其屋屋苑。有2座住宅,一個多層停車場。
  • 富欣花園:私人參建居屋屋苑。有8座住宅,一個4層停車場同一個1層商場。
  • 富怡花園:私人參建居屋屋苑。有5座住宅,一個10層停車場,頂層係球場。
  • 藍灣半島:由信和集團起,喺2001年起好,一共有8座樓高62層嘅住宅,地下設有商場藍灣廣場同公共交通交匯處。
  • 佳翠苑:居者有其屋屋苑。有2座住宅,一個多層停車場。
                                     

7. 公共交通

小西灣有好多巴士同小巴綫,而且唔少重過隧道過埋維多利亞港,甚至遠到赤鱲角機場都有。近嘅會駁去柴灣站。